Tazrawt ɣef tmegdawalt n yimyagen iḥerfiyen gar snat n tmeslayin n teqbaylit (At mengellat akked At muḥli)

Abstract

Tazrawt-nneɣ d tin i yemmugen ɣef tmegdawalt n yimyagen iḥerfiyen gar snat n tmeslayin n teqbaylit (tameslayt n At mengellat ilmend n usegzawal n J.M-Dallet akked tmeslayt n At muḥli). Nebda tazrawt-nneɣ s tezwert tamatut anda i d-nessegza d acu i d tamegdawalt d tezrawin i yemmugen fell-as, syin akkin nekcem ɣer yiferdisen n tesnarayt anda i d-nessassen amaru d kra n leqdicat i yexdem deg tudert-is d usissen n temnaḍt n At muḥli, ma d ayen yerzan tagmert n wammud nessemres iɣbula yuran, «Asegzawal n J-M.Dallet (1982)» iwakken ad neg tasleḍt i kra n yimyagen iḥerfiyen i yellan deg-s, imyagen-a negmer-iten-d s tantala taqbaylit ma d inumak-nsen s tutlayt tafransist akken i ten-id-yefka J-M.Dallet deg usegzawal-is. Syin akkin nerza ɣer temnaḍt n At muḥli akken ad d-nesteqsi ɣef yimegdiyen n yimyagen-a iḥerfiyen i d-negmer deg usegzawal-a. Deg teẓri nemmeslay-d ɣef wayen akk icudden ɣer tmegdawalt acku d tanakta tagejdant deg leqdic-nneɣ d usissen n wassaɣen i yellan gar-as d wassaɣen-nniḍen. Ma d ayen yerzan aḥric n tesleḍt deg-s nga tasleḍt i yimyagen iḥerfiyen i d-negmer seg usegzawal n J-M.Dallet (1982) seg uẓar (B → L), deg tazwara nebder-d awal akken i t-id-yenna JM. Dallet deg usegzawsal-is s teqbaylit d wazal-is s tutlayt n tefransist, syin akkin nga-asen tasleḍt deg wayen yerzan anamek i wawal-nni s tmeslayt n At muḥli. Yal awal i d-negmer deg usegzawal n J-M.Daller d imegdi-ines s tmeslayt n At muḥli nefka-as-d aẓar-is akked yimedyaten ma d tarrayt n usissmel n yimyagen deg tesleḍt akked wammud, tella-d ilmend n uẓar. Nekfa leqdic-nneɣ s teggrayt tamatut anda i d-nerra ɣef usteqsi agejdan n tezrawt-nneɣ u nessaweḍ ɣer yiswi-nneɣ anda i nesleḍ azal n 172 n yimyagen iḥerfiyen