Abstract:
Tazrawt-a « Tamlilt n tirmad n wurar deg uselmed-almad n tira n tmaziɣt, aswir wis ukuẓ n uɣerbaz amezwaru » tekki ɣer taɣult n tesnalmudt, yes-s nra ad nẓer ayen s d-igellu usemres n tirmad n unecreḥ deg uselmed-almad n tutlayt s umata akked tutlayt n tmaziɣt s wudem uzzig. Deg tazwara nbder-d ayen yellan d ussnan ɣef usentel n tezrawt-nneɣ, aya d ixef n teẓri d tesnarrayt i nebḍa ɣef kraḍ n yiḥricen; amezwaru yella-d ɣef wayen yerzan tira d tirawalt n tutlayt n tmaziɣt, wis sin yerza tasensegmit s unecreḥ; aneggaru yerza tarrayin i neḍfer iwakken ad d-negmer ammud n yinefkan, nga annay deg tneɣrit anda aselmad yesseqdec kra n tirmad s wurar, aya akken ad nwali anezwu n tneɣrit s usemres n tsekka-a n ulaɣmu, rnu nga tasleḍt i yifuras n yinelmaden deg snat n tsekkiwin n yiluɣma, wid n unecreḥ akked yimugna, akken ad nẓer ma tirmad n wurar ttɛawenent deg usnerni n tzemmar n tirawalt. Syin nuɣal ɣer yixef wis sin n tesleḍt ideg nga tasleḍt i wayen akk i d-negmer aya nebḍa-t ɣef sin n yiḥricen, amezwaru d tasleḍt n yinefkan n wannayen i nga, wis sin d tasleḍt n yifuras n yinelmaden ɣef yiluɣma imugna akked tirmad n unecreḥ. Γer taggara n tezrawt nufa-d, tirmad n wurar slalayent-d timegleyt akked lebɣi n ulmad deg tneɣrit ugar n yiluɣma imugna
