Anagraw n umyag aserwes gar tmeslayin Melbu (Ayt Segwal) akked d Tmeẓrit (At Yemmel)

Abstract

Asentel n tezrawt-a d aserwes n unagraw n umyag gar snat n tmeslayin n tantala taqbaylit, d taynantala, d aserwes gar temnaḍt n Tmeẓrit (Lεerc n At Yemmel) d lεerc n Ayt Segwal. Deg tezrawt-a, imi d aglam akked userwes, aḥric n teẓri d uḥric n tesleḍt dukklen deg yiwen n yixef iwumi ara nsemmi aglam n talɣa n umyag, aneggaru-ya nebḍa-t ɣef kraḍ n yiḥricen. Deg uḥric amezwaru, ad d-nemmeslay ɣef tecraḍ tigejdanin n umyag (Imataren udmawanen imagnuyen akked wuzzigen, askim n tmeẓri: win n wurmir, win n yizri, win n yizri ibaw, win n wurmir ussid, win n wanaḍ, n wanaḍ ussid akked d win n umaɣun). Deg uḥric wis sin, awal ad-yili ɣef tecraḍ tisuddimin n umyag (Aswaɣ, attwaɣ, amyaɣ, talɣiwin tisuddimin tuddisin). Ɣer taggara n yixef-a, deg uḥric wis kraḍ ad d-nessissen ticraḍ timazzayin n umyag (Amqim awsil usrid, amqim awsil arusrid, tazelɣa n tnila, amseḍfer n tecraḍ timazzayin deg wuddus anemyag akked tzelɣiwin n wuddus anemyag). Nefka-d tabadut n yal irem akked tmuɣli n yimusnawen, syin nefka-d amek i ten-nufa deg tmeslayin i terza tezrawt-a, nesserwes gar-asent nefka-d udmawen n umtawa akked wid n umgired, d wanta i iqerben ɣer tutlayt n tmaziɣt (Ayen yellan deg teẓri). Гer taggara n yixef nessaweḍ nesserwes tasnalɣa n umyag gar tmeslayin-a ama deg tecraḍ tigejdanin, tisuddimin, timazzayin. Nekkes-d udmawen n umtawa d umgired i yellan gar-asent. Nufa-d deg tecraḍ timazzayin i tella lemgirda s waṭas gar tmeslayin-a, ladɣa deg umseḍfer n tecraḍ timazzayin: Tameslayt n Tmeẓrit tessemras yiwet n tsenfelt deg yal udem amyag + amqim awsil arusrid + amqim awsil usrid + tazelɣa n tnila, maca deg tmeslayt n Ayt Segwal ssemrasen snat n tsenfal, tamezwarut am tin n Tmeẓrit ssemrasen-tt deg yal udem, anagar deg wudem wis kraḍ ama d asuf ama d asget ssemrasen tisenfelt tis snat amyag + amqim awsil arusrid