Abstract:
Tazwert-a tewwi-d ɣef ufares n uḍris ullis, deg tneɣrit n tmaziɣt, aswir wis ukuẓ, aɣerbaz alemmas. Iswi-nneɣ ad d-neglem tizemmar n yinelmaden deg ufares n tsekka-ya taḍrisant, ad nẓer ma semrasen timussniwin i ɣran deg temsirin n tegzemt. Dɣa nefka-d asteqsi-ya agejdan : Dacu-tent tzemmar n yinelmaden deg ufares n uḍris ullis deg tneɣrit n tmaziɣt, aswir wis ukuz, aɣerbaz alemmas? Nesbedd-d turda-ya : Inelmaden smersen timusniwin i ɣran deg temsirin n tegzemt n wullis.
Akken ad naweḍ ɣer yiswi-nneɣ, ad d-nerr ɣef turda d usteqsi-nneɣ agejdan, nga tasestant deg yiwet n tneɣrit n tmaziɣt, deg uɣerbaz alemmas, aswir wis ukuz, nesseqdec tafakust n tannayt iwakken ad d-nesken timsirin i ɣran yinelmaden nerna nseqdec tafakust n tesleḍt n warraten (ifuras n yinelmaden) iwakken ad d-nesken tizemmar-nsen n ufares n wullis ilmend n tmelmadt n uselmad.
Ɣer taggara, seld tasleḍt n yinefkan i d-negmer, nessaweḍ ad d-naf meḥsub azgen n umḍan n yinelmaden i d-yerran akken iwata ɣef tmelmadt n uselmad (i d-yewwin ɣef wayen ɣran deg tegzemt), dɣa snernan tizemmar-nsen deg ufares n uḍris ullis i asen-d-yettwasutren
