Tettwasbedd-d Tasga n Taɛrabt d Tsekliwin-is n Tesdawit Ɛebdraḥman Mira n Bgayet mi yuli wammas asdawan yuɣal d tsdawit, deg tella Tmezdeyt n Tsekliwin d Tussniwin Talsanin, seg useggas 1998/1999 d asawen, aseggas deg teldi tesga i yebda deg-s uselmed. Tennser-d tesga ɣef Tmezdeyt n Tutlayin d Tussniwin Talsanin deg 2010, akken ad tuɣal deg tmezdeyt n Tsekliwin d Tutlayin akked n tneglizit, tamaziɣt, d tefransist.

Tanmehla n tesga

Llan-d ɣef yixf n tesga seg wasmi teldi ara ass-s acḥal d aselmad. Deg tazwara d Mass Leqdim Ɛebdellah akked Tabti Farid, s yin akin d Massa Suɛad Ucayet, massa Qesri Xira, s yin akin d Mass Umeqran Ḥakim,  Betatac Buɛlam, d Ben Ɛli Lunis. Imir-a d Mass Ɛalem Musa i yellan d ixf n tesga, ttaleln-t sin n yimalalen: Massa Jeǧiga Bessuf, d tamalelt n tsensegmit, akked Mass Ṭaher Msili, d amalel n nnig turagt, Mass Yusef Raḥim d aselway n tesqamut tussnant akked Mass Tabti Farid d aselway n ugraw n Taɣult n usileɣ.

Tasensegmit

Aselmed deg tazwara ddmen taɛkemt-is kra n yiselmaden i d- isebdden tasga rnan sselḥan lecɣal-is: Leqdim Ɛebdellah, Farid Tabti, Arezqi Cemmun, Ḥakim Umuqran, Abdelmalek Bumenǧel. Ma deg useggas-a 2023/2024 llan 81 d aselmad, deg yal tafesna tussnant, deg-sen 11 n yimasdwanen, 27 n bab usrag aswir 1, 9 n bab n usrag aswir 2, 22 d aselmad amalal aswir 1, 21 d aselmad amalal aswir 2, llan deg yal taɣult, tizrawin tiseklanin, tizrawin tutlyanin, akked tezrawin tizeɣnatin.

Inelmaden

Asileɣ deg tesga yebḍa ɣef sin n yiḥricen: turagt akked Master, rnu ɣer waya asileɣ nnig turagt deg duktura.