Abstract:
Ticrad d « taẓuri n tfekka » deg wansay d yidelsan n imenzawen seg waṭas aya n wakud yezrin deg tmettiyin timaziɣin, urarent timlilin yemxalafen am utekki ɣer yiwen uɣref neɣ yiwen ugraw inmetti, neɣ am wallal n ucebbeḥ s lixsas n wallalen n uzriri, yezmer daɣen ad ilint d allal n usuji seg waṭṭanen s usexdem n kra n lesnaf n yemɣan. Ticrad ttgensayent-d allal n taywalt war ameslay. Zik tilawwin sexdament ticrad akken ad meslayent acku ur sɛant ara azref i tmeslayt, llant ttwaḥeqrent ihi snulfant-d tamamekt n tenfalit tiẓruzmulant iwakken ad ini ayen tettxemim. Amahil-nneɣ n unadi ibedden ɣef tezrawt n tecrad timensayin ɣer leqbayel i yettwarun deg taɣult n iẓruzmul, iswi-ines d asbeyyen n twuri n tecrad, tamuɣli tamawalant, iẓruzmul, d unamek n tecrad timensayin seg talɣa-nsent
