Tamlilt n Yimaziɣen-iɣelnaẓriyen deg umussu aɣelnaw d umennuɣ ɣef tmaziɣt (1945-1949)
Résumé
Deg useggas 1926, sbedden kra n yiminigen di Fransa yiwet n tiddukla, i wumi semman, Itri n Tferka n Ugafa, s yiswi ad nadḥen ɣef yizerfan n yixeddamen n Tferka Ugafa (Lezzayer, Tunes d Marruk). Aṭas n leqbayel i yettekkin deg-s seg-sen Raǧef Belqasem, Ifur Smer, Imac Smer. Iban-d umgired gar Messali d Imac ɣef tumast ara teḍfer tmurt, Imac yessuter ad fken adeg i tumast n tmaziɣt ad tesɛu azal-is am nettat am taɛrabt, maca Messali ur yeqbil ara.
Deg useggas 1945 ufraren-d kra n yilmeẓyen Iqbayliyen i yellan d inelmaden di tesnawit ikecmen deg umussu aɣelnaw, ttekkin deg ukabar n Uɣref Azzayri, qeddcen i uslelli n Lezzayer akked tumast tamaziɣt, qqaren-asen Imaziɣen-iɣelnaẓriyen.
Iswi n tezrewt-a d anadi ɣef leqdic n yimeɣnasen-a i wumi qqaren Imaziɣen-iɣelnaẓriyen deg umussu aɣelnaw d tumast tamaziɣt gar 1945 d 1949. Ad d-nerr deg-s ɣef usteqsi n tmukrist-a: d acu-tt temlilt i xedmen Yimaziɣen-iɣenaẓriyen deg umussu aɣelnaw d useḥbiber ɣef tumast tamaziɣt gar 1945 d1949? s ddaw usteqsi-a agejdan nefka-d aseqsi-a: d acu-tt tidet ɣef tezɣent tamaziɣt 1949? Nessexdem tarrayt tagelmant d tesleḍt mi d-nemmeslay ɣef leqdic ixedmen yimeɣnasen-a akked tarrayt timserwest anda i yella umgired ɣef yizmaz d tedyanin am umgied ɣef tmental n tezɣent tamaziɣt.
Nessemres deg unadi-a kra n yiɣbula am win i yura Hocine Ait Ahmed: « Mémoires d’un combatant », i yellan seg wid i ixedmen amezruy d amaziɣ-aɣelnaẓri, tḥuzat tezɣent-nni. Mohammed Harbi: « Le FLN, mirage et réalité », nessexdem adlis yettwasuqlen ɣer taɛrabt. Nessemres daɣen tizrawin-nniḍen yesɛan azal ɣas ur llint ara d iɣbula am udlis n Salem CHAKER: « Imazighen Ass-a» d «La question berbère dans le mouvement national algérien 1926-1980 ».
Seg yinalkamen iɣer nessaweḍ nezmer ad d-nini, Imaziɣen-iɣelnaẓriyen ḥemlen aṭas tamurt-nsen, llan kra ṭṭfen tamasit tunnigt, seg-sen Imac Ɛmer.
Nessaweḍ daɣen ɣer unalkam-a: Imaziɣen-iɣelnaẓriyen, llan d imezwura i isawlen ɣer tegrawla, send tidyanin n 08 mayu 1945.
Ma d ayen yerzan tazɣent tamaziɣt Nezmer ad d-nini, aɣbel meqqren mačči d tumast, maca d aɣbel n yiba[1] n tugdudt s daxel ukabar, i d-yettuɣalen acḥal n tikkal.
Awalen isura
Akabar n Uɣref Azzayri/Amussu i Talekt n Tlelliyin Timagdayin, Imaziɣ-ɣelnaẓriyen, tumast tamaziɣt, Tazɣent tamaziɣt.
